Projektbuxheti 2027 parashikon pesë faza të reja për zgjerimin e autostradës Tiranë–Durrës, me financim deri në vitin 2031.

Zgjerimi i autostradës Tiranë–Durrës pritet të vijojë me faza të tjera, përtej ndërhyrjeve të përfunduara dhe segmenteve ku aktualisht po punohet. Në listën e investimeve që shoqëron projektbuxhetin 2027 janë përfshirë pesë faza të reja, nga faza VI deri te faza X, me një vlerë të përgjithshme të planifikuar prej 16.2 miliardë lekësh.

Planifikimi i këtyre investimeve sugjeron se zgjerimi i autostradës do të shtrihet edhe përtej mbikalimit të Rinasit, megjithëse tabela buxhetore nuk përcakton kufijtë kilometrikë të secilës fazë. Sipas dokumentit, fondet e para për këto ndërhyrje parashikohen në vitin 2028, ndërsa financimi do të shtrihet deri në vitin 2031.

Pesë faza të reja, nga 3 deri në 4.2 miliardë lekë secila

Sipas planifikimit buxhetor, fazat VI, VII, VIII dhe IX të zgjerimit të autostradës Tiranë–Durrës kanë një vlerë të parashikuar prej 3 miliardë lekësh secila. Ndërkohë, faza X ka një vlerë më të lartë, prej 4.2 miliardë lekësh.

Në total, këto pesë faza përfaqësojnë një investim të planifikuar prej 16.2 miliardë lekësh, i cili pritet të realizohet në mënyrë të shkallëzuar gjatë viteve 2028–2031.

2.56 miliardë lekë financim për zgjerimin e autostradës gjatë vitit 2027

Ndërkohë, për vitin 2027, zgjerimi i autostradës Tiranë–Durrës ka një financim të përgjithshëm të planifikuar prej 2.56 miliardë lekësh.

Këto fonde do të mbështesin dy lotet ku kanë nisur punimet deri në nënkalimin e Limuthit, si dhe fazat IV dhe V, të cilat janë përfshirë për herë të parë në planifikimin buxhetor të një viti më parë.

Segmenti i parë i zgjeruar i autostradës, me gjatësi rreth 6 kilometra nga Tirana deri te mbikalimi i Rinasit, është hapur plotësisht për qarkullimin e automjeteve që prej prillit 2026.

Ky segment ka 8 korsi në total, nga 4 për secilin drejtim, duke u kategorizuar si rrugë e kategorisë A. Zgjerimi synon të përmirësojë kapacitetin e qarkullimit dhe të lehtësojë lëvizjen në një nga segmentet më të ngarkuara rrugore të vendit.

Zgjerimi synon rritjen e kapacitetit të një prej akseve kryesore të transportit

Ndërhyrjet e mëtejshme në autostradën Tiranë–Durrës synojnë rritjen e kapacitetit të një prej akseve më të rëndësishme për transportin e udhëtarëve dhe mallrave në Shqipëri.

Kjo autostradë lidh kryeqytetin me Durrësin dhe shërben njëkohësisht për lëvizjen drejt Aeroportit Ndërkombëtar të Tiranës në Rinas, zonave industriale dhe bregdetit.

Me përfshirjen e pesë fazave të tjera në planifikimin e investimeve publike, zgjerimi i autostradës Tiranë–Durrës parashikohet të vijojë edhe gjatë viteve të ardhshme, ndërsa financimi i fazave të reja është programuar deri në vitin 2031.

Burimi: Scan